Валенсија поведе, но Левандовски обезбеди цел плен за Барселона на „Месталја“ (Видео)

Воведната рунда во шпанската Ла Лига донесе дерби пресметка меѓу Валенсија и Барселона на „Месталја“, натпревар кој ги задоволи страстите во првите 60, но не и во завршните 30 минути.

Валенсија и Барса играа навистина динамично во тешки и топли временски услови, а иако домаќините беа тие кои имаа повеќе желба и поведоа со голот на Уго Дуро, радоста меѓу домашните навивачи траеше навистина кратко.

Веднаш по првиот гол на Дуро, истиот играч имаше колосална шанса за 2:0, а откако тоа не го искористи, гостите од Каталонија казнија во последната минута од продолжението во првиот дел.

Роберт Левандовски се најде на вистинско место по додавањето од Ламин Јамал, па се чини дека овој погодок влијаше многу лошо за Валенсија на психолошки план, што се одрази на стартот на вториот дел.

Москера направи непотребен пенал во 47-та минута и му дозволи на Левандовски со својот втор гол да направи пресврт, па ова беше и почеток на крајот на дербито кое до крајот не донесе никакви возбудувања.

Интензитетот сериозно падна во последните 30 минути и домашниот тим остана без енергија да ја брка негативата, па така Барселона рутински го одбрани водството и го запиша првиот триумф во Примера во ерата на Ханси Флик.

Инаку, Столе Димитриевски беше дел од протоколот на ова дерби, но Рубен Бараха му даде предност на Мамардашвили кој е пред трансфер во Ливерпул.