Валчак: Вардар e клуб што не се одбива, ова ќе биде одлично искуство

Актуелниот европски шампион Вардар продолжи да го формира составот за следната сезона, а најновата аквизиција е 27-годишниот полски интернационалец Патрик Валчак.

Вардар се засили со кружен напаѓач од Полска

Се работи за играч кој ја покрива позицијата кружен напаѓач, играч кој во Скопје доаѓа од Германија од таборот на Либек. Ова за Валчак ќе биде ново искуство и тој самиот признава дека едноставно не можел да ја одбие оваа понуда од клуб како Вардар кој во последниве години се афирмираше како еден од најдобрите на стариот континент.

-Не размислував долго за понудата. Тоа е клуб кој игра во ЛШ што сега сега е многу потешко да се стигне откако го променија форматот, исто се натпреварува и во СЕХА лигата, а има и многу големи играчи како Марко Вујин и Тимур Дибиров. Ќе имам многу шанси за игра и верувам  ќе биде одлично искуство, -вели  Валчак кој пред пандемијата имал понуди од клубовите од Бундеслигата.

-Пред пандемијата разговарав со клубови од првата Бундеслига, ама коронавирусот парализираше многу работи. Во меѓувреме благодарение на мојот нов менаџер почнав преговори. Вардар гледал видеа од мене, беа заинтересирани за соработка и успеавме да дојдеме до договор. Не се грижам за финансиите, добив гаранции дека се ќе биде во ред, -истакнува Полјакот кој не се плаши од конкуренцијата или во случајот тоа се Стојанче Стоилов и Глеб Калараш.

-Јас можам да играм и во напад и во одбрана. Mоже да се воспостави рамнотежа. Стоилов повеќе се користи во нападот, Калараш во одбрана, -заврши новиот член на „црвено-црните“.