В сабота и недела се одржува „Европскиот јуниорски џудо куп – Скопје 2024“

Џудо федерацијата на Македонија по втор пат го организира „Европскиот јуниорски џудо куп“, за кој минатата година доби највисоки оценки околу организацијата.

На вчерашната прес конференција со која беше најавен и настанот, беше присутна и потпретседателката на ЕЏУ, Катарина Родригез, која најави дека оценките за организацијата на годинешново натпреварување ќе придонесат за потврдување на одлуката во 2025 година на Македонија да ѝ се додели организацијата на Европското кадетско првенство.

Во салата „Јане Сандански“ постојат одлични услови за натпреварување, а малата сала која што се користи како „простор за загревање“ е адут каков што немаат многу други организатори.

Најавено е учество на 260 џудисти од Европа, но исто така и од Канада и Саудиска Арабија, кои имаат право да настапуваат на Куп – натпреварувањата, бидејќи со тоа се стекнуваат поени за рангиранње на светската листа, што подоцна се користи при изработката на стартните ростери.

Македонија ќе биде претставена од 19 членови, 10 во машка и 9 во женска конкуренција. На прес конференцијата во пресрет на настанот, претседателот на џудо федерацијата, Владимир Трпановски, најави дека очекува од нашите учесници да стигнат до борба за медалите.