Ужасна вест по мечот во Мадрид: Најпријатното изненадување во стартниот тим на Ханси Флик ја заврши сезоната!

Барселона направи пресврт и славеше на гостувањето во Мадрид кај Рајо Валјекано со 1:2, но остварениот триумф остана во сенка на тешката повреда која ја заработи Марк Бернал.

Младинецот кој се избори за шанса во стартната постава на Ханси Флик беше најпријатно изненадување на стартот на новата сезона, но младиот играч за врска сега ќе мора да мине низ најтешкиот период во кариерата, но и во животот.

Бернал се пожали на болки во самата завршница по еден дуел со Иси Паласон, па иако веднаш стана јасно дека се работи за повреда на коленото, од Каталонија за жал пристигнаа најлошите вести.

17-годишниот фудбалер го скинал предниот вкрстен лигамент на коленото и ќе мора да прави операција во најскоро можно време, поради што го чека период на рехабилитација од шест до девет месеци.

На овој начин, стартот од соништата во првиот тим полека се претвора во ноќен кошмар за младинецот на Барса, кој повеќе од веројатно става крај на сезоната уште на крајот на месец август.