Ужасен викенд за Маркез: Казна од Мото ГП и операција на раката по инцидентот кој го предизвика во Португалија

Марк Маркез направи голема грешка во самиот вовед на трката во Португалија и му ја уништи шансата за победа на Мигел Оливеира, но истовремено, му нанесе голема штета и на Хорхе Мартин кој иако остана на патеката во прв момент, на крајот остана без пласман.

Осумкратниот светски шампион влезе преагресивно во четвртиот свиок на патеката во Портимао и буквално го собра Оливеира со својот мотоцикл, а најдобра вест беше тоа што не му нанесе некоја потешка повреда која можеше да значи и крај на сезоната за Португалецот.

Стартот на мундијалот во Мото ГП дефинитивно не стартуваше онака како што посакуваше Маркез, кој на крајот испадна дека го извлече и најдебелиот крај кога се повредите во прашање.

Лекарите утврдиле дека Маркез има фрактура на десната рака и веќе подлегнал на операција, поради која ќе ја пропушти наредната трка во Аргентина, со напомена дека казната која ја заработи ќе ја одработи во Тексас.

Планот е Маркез да се врати на патеката во Остин, но таму ќе мора да ја отслужи казната од „два долги круга“ која ја заработи поради вчерашниот инцидент кој го предизвика.

– Навистина ми е многу тешко за Оливеира, веднаш побарав извинување и не е лесно. Им се извинувам и на португалските фанови, ова беше домашната трка на Оливеира. Направив огромна грешка и од адреналин, не почувствував дека имам повреда на раката и дека коленото ми е отворено. Дознав дека имам посериозни повреди кога дојдов во боксот, – изјави Маркез.