Уште едно засилување на Јувентус оди на принудна пауза

Јувентус доведе многу нови имиња во последниот преоден рок, но тренерот Тиаго Мота уште на почетокот на сезоната мора да се соочи со отсуства над дел од засилувањата.

Кефрен Тирам се повреди уште по првото коло и ги пропушти следните натпревари до репрезентативната пауза, талентираниот Василија Аџиќ не ни доби шанса да дебитира поради повреда во подготвителниот период, а сега на списокот повредени се нашол и Франсиско Консеисао.

Крилниот напаѓач дебитираше на дуелот со Рома во Серија А, со својот настап најави дека ќе биде сериозна опасност за ривалите по десната страна, но вчера на тренинг заработил мускулна повреда.

Тоа значи дека Португалецот оди на принудна пауза која сигурно ќе трае неколку недели и прашање е дали ќе биде подготвен за дербито со Наполи кон крајот на месецот.

Повреда по првото коло заработи и Тимоти Веа, па тоа е уште еден фудбалер кој ги пропушти последните натпревари на Јувентус во домашното првенство.