Унгарија го доби мечот за петтото место и оствари најдобар резултат на ЕП

Унгарија го мина во сенка ова Европско првенство и доста тивко стигна до самата завршница, а на крајот оваа селекција оствари и најголем успех на континенталните собири.

Со битката за петтото место беше отворен денешниот натпреварувачки ден во Германија, па така Унгарија го доби дуелот со Словенија и оствари најдобар успех на Европските првенства.

Сосема очекувано, мечот беше навистина тврд и неизвесен и двата тима имаа свои моменти, но во клучните моменти подобри беа Унгарците кои славеа во драматична завршница со 23:22.

Словенците беа подобри во првите 30 минути и на пауза заминаа со гол позитива, меѓутоа потклекнаа во завршницата и откако не постигнаа гол во последните две минути, на крајот мораа да се задоволат со шестото место.

Банхиди и Лекаи постигнаа по пет голови во победничкиот тим, додека кај Словенија со по четири најефикасни беа Зарабец и Благотиншек.