УЕФА не се откажува од Лигата на нации

Македонската фудбалска репрезентација е една од оние кои се уште очекуваат нова одлука за термините за завршницата на Лигата на Нации, а УЕФА барем засега не може да „пресече“ со оглед на неизвесноста поврзана со коронавирусот.

Но, како што пренесуваат англиските медиуми предводени од „Мирор“, челниците на УЕФА цврсто стојат зад ова натпреварување и не планираат да се откажат од предвидените натпревари, но и од следната сезона во Лигата на нации.

Поместувањето на Европското првенство за следното лето значи дека крајот на оваа година овозможува простор за натпревари од актуелната или новата сезона, а Македонија најпрвин треба да се соочи со Косово во борбата за пласман на ЕП кое ќе се одржи во 2021 година.

За новата сезона, планот на УЕФА е во слотовите за меѓународни натпревари, наместо два, да има три термини, со што ќе може да се организира и групната фаза, а финалниот турнир евентуално би бил поместен за наесен во 2021 година, односно по завршувањето на ЕП.