УЕФА може да го задржи системот со завршен турнир во Лигата на шампионите

Европската фудбалска федерација сезонава принудно мораше да го промени системот во завршницата на Лигата на шампионите и Лига Европа, но очигледно тој доби и голем број фанови.

Најпрвин, Карл-Хајнц Румениге јавно истакна дека ќе се залага и во иднина да се игра завршен турнир со по еден натпревар, а сега во слична насока оди и изјавата на претседателот на УЕФА, Александар Чеферин.

– Мора да кажам дека овој систем со по еден натпревар, мене ми изгледа многу поинтересно и поатрактивно од класичната завршница со по два натпревара.

– Ова е една од ретките позитивни работи кои се случија поради коронавирусот. Моравме да донесеме вакво решение, но на крајот тоа се покажа како интересно.

– Јасно е дека тешко може да вметнеме фајнл-ејт завршница во календарот, но видовме дека овој систем им е интересен на фановите, пред се бидејќи секој може да победи секого кога се игра еден дуел. Мора да разговараме на оваа тема и наредниве месеци да донесеме одлука, – изјавил Чеферин, кој размислува за ваква завршница во двете натпреварувања.