УЕФА горда на ФФМ: Направени напори за применување на најдобрата опција

Управниот одбор на ФФМ денеска го прифати предлогот на Натпреварувачката комисија за прекин на државното првенство во фудбал за сезоната 2019/2020 година, како и во Купот на Македонија.

Во соопштението кое го лиферуваше ФФМ, како причина за ваквата одлука се наведува развојот на ситуацијата на државно ниво со ширењето на „COVID-19“, како и ситуацијата во која се најдоа некои фудбалски клубови каде што беа прогласени вонредни мерки на карантин откако заболеа неколку фудбалери.

– Раководството на Фудбалската федерација на Македонија оваа одлука им ја соопшти и на службите во УЕФА, потенцирајќи ја состојбата во нашата држава од здравствен аспект и неможноста да се предвиди временската рамка во однос на евентуалното продолжување на првенството, односно со ново настанатата ситуација не може да се гарантира дека продолжувањето на националниот шампионат би имал регуларен тек,- се вели во соопштението објавено од ФФМ.

Исто така се наведува дека во одговорот добиен повратно, УЕФА е исклучително горда на нашата федерација.

– ФФМ и покрај сите предизвици во изминатиот период имаше за цел да направи обид и да ја примени најдобрата опција за продолжување на клупското натпреварувања од Прва МФЛ,- се дополнува во дописот.

За жал сите напори да се овозможи правилно, по спортска заслуга, продолжување и завршување на домашното натпреварувања, не беа успешни поради новата ситуација.