УЕФА го одложи натпреварот на Тотенхем од Конференциската лига

Големиот број фудбалери заразени со ковид-19 во редовите на Тотенхем ја натера УЕФА да го прифати барањето на англискиот тим за одложување на средбата со Рен.

Дуелот од Конференциската лига ќе се одигра во засега недефиниран термин, а се чини дека одлуката е најлогична откако Тотенхем пријави голем замав на вирусот во својот сениорски тим.

Менаџерот Антонио Конте потврди дека дури осум фудбалери имале позитивен тест, а заразени се и пет члена на стручниот штаб на Тотенхем.

Во лондонскиот клуб се плашат од дополнително ширење на бројот на заразени, а превентивно е затворен и тренинг центарот, за да се спречи поголем ризик за сите кои работат во него.

Средбата Тотенхем-Рен требаше да се игра утре од 21 часот, а влијае и врз пласманот во групата, бидејќи Тотенхем се бори за второто место со Витесе.