Убедливиот Садулаев стави крај на шансите за медал на Нуров

Рускиот борач Абдулрашид Садулаев уште еднаш се истакна како најсериозен кандидат за златото во својата категорија и експресно го победи Рејнерис Салас Перез во полуфиналната рунда.

Кубанецот влезе во борбата во категоријата до 97 килограми, во обид да го изненади фаворитот, но и да му овозможи на македонскиот борач Магомегдаџи Нуров да се бори за бронзен медал преку репасаж.

Садулаев го победи Салас Перез со 4:0 и на тој начин си избори финале и дефинитивно стави крај на надежите на Нуров и Македонија за нов олимписки медал во Токио.

Нашиот борач рано утринава го победи Тунижанецот Саадуи Мохамед со 5:0, а во четвртфиналето загуби од Салас Перез со 6:4.

Со настапот на Нуров е комплетирано македонското учество на Олимпијадата во Токио, кое ќе биде запаметено по сребрениот медал на таеквондистот Дејан Георгиевски.