У21: Македонија претрпе висок пораз од Холандија во Алмере

Македонската младинска репрезентација до 21 година го претрпе петтиот пораз на седмиот меч во квалификациите за Европското првенство, откако вечерва не најде никакво решение за играта на разиграната Холандија.

Најдобриот тим во нашата група ја потврди фаворитската улога на доминантен начин и целосно доминираше на пресметката која се одигра во Алмере, постигнувајќи пет гола од 17 шута во рамката на нашиот гол.

Избраниците на Драган Канатларовски немаа решение за лидерот во групата и речиси да не се приближија до противничкиот гол, нешто за што говори и статистиката која вели дека нашиот младински тим немаше удар кон голот.

Голманот Алчевски беше најдобар поединец во нашиот тим и собра 12 успешни интервенции, што значи ако не беше тој, поразот ќе беше уште поубедлив.

Регер го отвори резултатот уште во 2-та минута, Охие 20 минути подоцна зголеми на 2:0, по што следеа два хола на Манхов на стартот на вториот дел. Конечните 5:0 ги постави Регер со својот втор гол на мечот.

Ова е петти пораз во седмиот меч за Македонија, но сега тимот на Канатларовски ќе има шанса да се врати на победничките патеки, бидејќи за четири дена игра против Гибралтар кој е последен во групата.