Турција остана без селектор по дебаклот против Холандија

Репрезентацијата на Турција претрпе тежок пораз од Холандија од 6-1 во мечот од квалификациите за Светското првенство, меч кој му пресуди на досегашниот селектор Шенол Ѓунеш.

Имено турската фудбалска федерација одлучи да се раздели со Ѓунеш по овој пораз кој беше кулминација на незадоволството во изминатиот период. Имено Турција имаше многу лош настап на Европското првенство, шампионат на кој многумина очекуваа да биде и изненадување.

Лошите партии продолжија овој месец каде на домашен терен беше испуштена победа против Црна Гора (2-2) за да потоа со доста мака биде добиен Гибралтар.

Потопот дојде во Амстердам каде избраниците на Ѓунеш беа надиграни, посрамотени, па сето ова придонесе федерацијата да реши и стави крај на соработката со 69-годишниот стручњак.

Ова за Шенол беше втор мандат како селектор, во првиот од 2000 до 2004 година го донесе најголемиот успех на репрезентацијата, трето место на СП во 2002 година.