Тухел за јануарското засилување: Јазичната бариера му ја успорува адаптацијата

Баерн Минхен одигра добар натпревар против Лацио во Лигата на шампионите, а тренерот Томас Тухел посакува истиот пристап да биде употребен и во продолжението од сезоната во Бундеслигата.

Баварците и минатото коло освоија само бод и му дозволија на Баер Леверкузен да се одлепи на плус десет, а Тухел го најавил денешниот дуел со Мајнц на вообичаена прес-конференција.

Една од темите била и засилувањето Брајан Сарагоса, кој во јануари пристигна од екипата на Гранада.

– Брајан не зборува англиски и германски, а тоа е голем проблем.

– Го забрзавме трансферот и го доведовме во јануари за да добиеме на време за адаптација и затоа што не знаевме колку ќе им треба на Гнабри и Коман да се вратат во тимот.

– Знаевме дека тое ќе биде голем чекор за него, тоа се забележува откако е тука. Поседува фудбалски квалитети, но ќе му биде потребно повеќе време за адаптација, посебно поради јазичната бариера. Сигурно ќе му дадеме време, – рекол Тухел.

Шпанецот досега има само еден настап, односно 28 минути кои ги одигра во поразот од Бохум.