Тухел сепак дочека чудо: Играчот кој го отпиша за финалето му се става на располагање

Матео Ковачиќ заработи незгоден удар на последниот натпревар во Премиер лигата, па поради бруталноста на стартот кој го режираше Џејмс, Томас Тухел практично го прецрта Хрватот за големото финале во ФА Купот.

Германецот тогаш нагласи дека ќе биде потребно чудо Ковачиќ да настапи на „Вембли“, но на 24 часа пред натпреварот со Ливерпул, Тухел вели дека лекарскиот тим и играчот се блиску до такво нешто и Хрватот ќе проба да се стави на располагање на тимот.

– Ќе пробаме на денешниот тренинг, што е всушност огромно изненадување со оглед на ситуацијата која ја имавме по мечот со Лидс. Но, Матео сака да пробам и медицинскиот тим даде зелено светло за тоа. Предноста кај него е тоа што лигаментот на зглобот веќе беше скинат од минатиот инцидент и не постои нова повреда.

– Има голема болка и оток, но се надеваме дека ќе стигне навреме утре и дека ќе успее во својата намера. Веруваме дека ќе му се исплати трудот, – изјави Тухел, кој даде изјава и за Нголо Канте.

– Канте исто така ќе проба. Тој проба уште на вчерашниот тренинг и тренираше со соиграчите како и обично. Тој верува дека ќе дојде до 100 проценти утре и тоа ќе биде клучно за нас, – изјави Тухел.