Тухел откри дека добил „корпа“ од најголемата ѕвезда на Манчестер Јунајтед: Сериозно го сакав во мојот тим

Челси и Манчестер Јунајтед ќе се соочат во денешниот дерби натпревар кој ќе се одигра на „Стемфорд Бриџ“. Овој натпревар ќе привлече најголемо внимание затоа што истиот ќе покаже до каде е напредокот на „сините“ под водство на Тухел, како и дали Манчестер Јунајтед може со победа дополнително да се одлепи на втората позиција и речиси да си го завери пласманот во Лигата на шампионите за следната сезона.

Пред меѓусебната средба, Тухел имаше само пофални зборови за фудбалерите на Манчестер Јунајтед, а посебно го издвои Бруно Фернандеш кој е движечката сила на „ѓаволите“.

Тухел призна дека го посакувал португалскиот ас во редовите на ПСЖ, но никогаш не успеал ниту да му се доближи, а камоли да го ангажира.

– Мојот прв спортски директор во Парис, Антеро Енрике беше португалски спортски директор и го знаеше Бруно многу добро. Се боревме да стигнеме во контакт со него и да го донесеме во нашиот тим. Свесен бев за неговите квалитети, но потоа гледавме уште повеќе натпревари, го следев и се обидов да стапам во контакт со него за да го ангажирам.

– Сепак, како што е познато, тој одлучи да потпише за Манчестер Јунајтед, а јас никогаш не добив можност лично да стапам во контакт со него. Се обидовме, но тој избра поинаков пат. Лошо е за нас како тим што  мора да се соочиме со него, -изјави Томас Тухел.