Тринкао се претвори во херој, Португалија се издигна и покрај лошиот пенал на Роналдо (Видео)

Португалија успеа да ја заборави ужасната партија на „Паркен“ во Копенхаген и се претстави во далеку подобро светло вечерва во Лисабон, натпревар на кој ја остави зад себе фудбалската лекција која ја доби од Данска на нејзин терен.

Тимот на Роберто Мартинез имаше стопроцентна шанса да поведе уште во 6-та минута кога Кристијано Роналдо ја стави топката на белата точка, но наместо очекуван гол, видовме ретко лош изведен пенал од капитенот, кој беше лесно прочитан од Каспер Шмајхел.

Нереализираниот пенал сепак не влијаеше негативно врз самодовербата на домаќините, па Португалија до крајот на првиот дел поведе со автоголот на Андерсен, што само беше најава на исклучително неизвесното второ полувреме.

Данците се вратија во игра и израмнија преку Кристенсен на 1:1, но набрзо после тоа, Роналдо не погреши по вторпат и од игра повторно ја врати предноста за домаќините.

Резултатот 2:1 гарантираше продолженија, но Данска повторно постигна гол за 2:2, овојпат преку Ериксен. Гостите беа блиску до пласман во полуфиналето во Лигата на нации, но со такво нешто не се согласи Тринкао, кој вечерва прерасна во херој на „Жозе Алваладе“.

Фудбалерот на Спортинг погоди за 3:2 и продолженија во 86-та минута, а потоа во дополнителните 30 минути го постигна голот за 4:2. Пред самиот финиш на натпреварот, во листата на стрелците се запиша и Рамош за конечни 5:2 и полуфинале меѓу Португалија и Германија на завршниот турнир во Лигата на нации.

Головите погледнете ги ТУКА