Трилер меч за паметење во ЛШ: Копенхаген со луда победа му зададе тежок удар на Јунајтед (Видео)

Манчестер Јунајтед можеше да избие на второто место во својата група доколку оствареше победа на „Паркен“, па иако беше на добар пат да направи такво нешто, сепак „ѓаволите“ на крајот доживеаја голем шок и претрпеа нов сериозен удар во Европа.

Фаворизираниот тим од Англија поведе во Данска со двата гола на Расмус Хојлунд и се чинеше дека тимот на Ерик Тен Хаг ги контролира случувањата на теренот, но тоа беше така до 42-та минута.

Невнимателниот Маркус Рашфорд заработи директен црвен картон и ги остави соиграчите на цедило, а Копенхаган до крајот на првиот дел израмни со головите на Елјунуси и Гонсалвеш.

Копенхаген со играч повеќе на теренот продолжи да напаѓа во вториот дел и имаше силна иницијатива, но при една акција на гостите, Мегваер се избори за пенал и донесе огромна шанса за Јунајтед.

Бруно реагираше како вистински капитен и испрати неодбранлив удар од 11 метри за 2:3, но до крајот имаше уште 20 минути и Данците повторно успеаја да се вратат, а на крај и да остварат голема победа.

Лерагер израмни на 3:3 во 83-та минута, а четири минути подоцна 17-годишниот Бардаџи погоди за 4:3 и му зададе тежок удар на англискиот великан. Копенхаген со првата победа во групата сега втор со четири бода, исто толку има и Галатасарај, додека Јунајтед е четврти со три бода. Во последните две кола ќе се одлучува за патникот во следната фаза, бидејќи Баерн Минхен е сигурен на првото место и веќе е во осминафиналето.