Тренерот на Рајо смета дека Димитриевски и соиграчите профитирале од една одлука на Анчелоти

Рајо Валјекано мораше да страда и да стравува до последната секунда од натпреварот на „Сантијаго Бернабеу“, но на крајот успеа во намерата и освои голем бод на тешкото гостување.

Играч на мечот беше нашиот Столе Димитриевски кој имаше спектакуларна партија во домот на „кралевите“, а иако доби пофалби од цела јавност за изданието кое го имаше, тренерот Франсиско во својата анализа за ремито посочи дека им помогнала и една одлука на Карло Анчелоти.

Италијанецот го повлече Лука Модриќ од игра на 20 минути пред крајот, а Франсиско вели дека неговиот тим дишел многу помирно без Хрватот на теренот.

– Добро го подготвивме мечот и целта беше да имаме висок пресинг во нивната половина, но тие добро го интерпретираа мечот и Модриќ играше странично. Тоа направи да мораме да чекаме и се браниме во добар дел од мечот. Мислам дека ги исконтролиравме добро Винисиус и Белингем, без оглед на тоа што немавме голема инволвираност на нивната половина.

– Модриќ најдобро ја читаше нашата игра и интерпретираше каде може да ни нанесе штета. Имавме проблеми со него, а кога тој излезе од игра, мојот тим беше подобро поставен и полесно дишевме. Иако страдавме до крајот, имавме поголема контрола на случувањата на теренот. За да освоите нешто на вакво стадион мора да страдате, а ние го направивме тоа, – изјави Франсиско.