Трапановски очекува деби во Торшавн: Сигурен сум дека ќе се вратиме со три бода

Кристијан Трапановски имаше одличен старт на авантурата во Данди Јунајтед и тоа му овозможи да добие прв повик во националниот тим, па сега офанзивниот фудбалер секак очекува да го дочека и дебито во дресот на Македонија.

Нашата најсилна репрезентација ги стартува предизвиците во новото издание во Лигата на нации и во наредните денови ќе ги одмери силите со Фарски Острови и Ерменија, со тоа што првиот меч го играме во Торшавн.

Трапановски ќе чека шанса за докажување против Фарски Острови и ќе биде навистина интересно да се види како би функционирал во нападот со Бојан Миовски, а во пресрет на натпреварот, фудбалерот на Данди Јунајтед не крие дека тој и соиграчите влегуваат како фаворити.

– Задоволство ми е што сум дел од националниот тим на Македонија. Се надевам дека ќе ја искористам оваа шанса и ќе ги покажам моите квалитети. Групата ме пречека одлично, се чувствувам супер. Иако ова е првпат да бидам со соиграчите, се чувствувам како долго време да сум тука.

– Нашата цел е да освоиме што е можно повеќе бодови, ако е можно да ги победиме сите натпревари и да се пласираме во следната рунда. Фаворити сме, но во денешно време нема лесни противници во фудбалот.

– Сметам дека ние како тим сме многу поквалитетни од Фарски острови. Теренот и времето нема да прават проблеми ако ние бидеме на вистинското ниво, сигурен сум дека ќе ги освоиме трите бода, – вели Трапановски.