Трансфер „бомба“: Манасков потпиша за Вардар, првата порака ја испрати до навивачите 

Најдобриот македонски ракометен состав Вардар 1961 го претстави најновото засилување кое е најзвучно во овој преоден рок затоа што се работи за македонскиот репрезентативец Дејан Манасков.

Манасков по шест години се враќа дома и тоа во клубот за кој последен настапуваше во татковината пред да заигра во Рајн Некар Левен и Веспрем каде ги мина изминативе пет сезони.

-Здраво драги навивачи на Вардар. Драго ми е што повторно се враќам во овој клуб по неколку години и се надевам дека сите заедно ќе ги оствариме целите на клубот, ќе го вратиме клубот таму каде што припаѓа. Сите заедно да се радуваме во новата сезона на нови успеси, -порача 29-годишниот Деки во својата прва порака која беше наменета за поддржувачите на најтрофејниот македонски ракометен клуб.

Левото крило ќе им се приклучи на соиграчите кои тренираат во Скопје, а своето деби во новата средина треба да го има на турнирот во Струга кој е на програмата од 16 до 20 август.

Дејан во досегашната кариера има настпувано уште за Металург и Вецлар. Тој е трето ново име во редовите на скопскиот прволигаш, претходно пристигнаа Милан Лазаревски и Андреј Добрковиќ.