Тото Волф обелодени што се крие зад медиумскиот молк на Хамилтон

Непосредно по крајот на трката во Абу Даби, Луис Хамилтон даде изјава за неколку телевизиски куќи, но од фамозната недела кога се реши шампионското прашање во Формула 1, седумкратниот светски првак нема одработено ниту едно интервју и се нема појавено на јавен настан.

Возачот на Мерцедес ја прескокна церемонијата на ФИА и не се појави на свеченото доделување на наградите искажувајќи јасен револт за случувањата на последната трка, а со оглед на тоа што го продолжува молкот, се појавија и шпекулации дека тој може и воопшто да не се врати во „најбрзиот циркус“.

Тимскиот шеф на Мерцедес не се осмели да дава конкретни одговори на оваа тема, но затоа нагласи дека Хамилтон се уште е многу повреден и оттаму се крие неговиот молк.

– Сите бевме облеани со силни емоции, а особено Луис Хамилтон. Тој беше победник на светскиот шампионат до последниот круг и потоа ти крадат се во еден момент. Секако дека се губи вербата, едноставно тешко се прифаќаат такви работи.

– Знам зошто Хамилтон се уште молчи. Молчи поради тоа што нема зборови за она што се случи и она што го доживеа. Некои работи се тешки за прифаќање, – вели Тото Волф во интеврјуто за „Motorsport-total.com“.