Тирам и Лаутаро инспиратори на победата на Интер во Торино

Интер имаше еден непријатен кикс со Болоња пред почетокот на репрезентативната пауза, но две недели подоцна, избраниците на Симоне Инѕаги одговорија на доста добар начин.

Гостувањето во Торино никогаш не е лесно сценарио за било кој ривал, а Интер успеа да го скрши отпорот во второто полувреме во кое ги постигна сите три гола.

Гостите од Милано се мачеа да го скршат мразот, но откако Маркус Тирам погоди за 0:1 по додавањето од Дамфрис, работите значително се олеснија и играчите на Интер почнаа да играат поопуштено.

По еден корнер, Лаутаро Мартинез беше на вистинско место и погоди за 0:2, а во судиското продолжение во листата на стрелците се запиша и Чалханоглу кој изведе пенал.

Со новите три бода, Интер се враќа на врвот на табелата во Серија А, во исчекување на резултатот од натпреварот кој ќе го игра Милан против Јувентус.