Тиквеш со пресврт ја освои „Железарница“, „пандевци“ освоија три бода со ремек-дело во 94. минута

Ова попладне се доиграа преостанатите три натпревари од 28-то коло во Првата македонска фудбалска лига, а од остварените резултати, добивме нов тим на второто место на табелата.

Македонија Ѓорче Петров вчера се искачи на втората позиција, но денеска истата ја презема Академија Пандев, откако струмичани победија на тешкото гостување во Тетово со спектакуларен гол во 94-та минута.

Мартинага режираше ремек-дело од слободен удар и совршено биеше со лева нога од 30-тина метри, мајсторија со која донесе победа и истовремено означи крај на натпреварот под Шар планина.

Вториот тетовски тим, Шкендија ремизираше во разочарувачки меч против Брегалница во Штип со 0:0, додека најмногу голови видовме во главниот град.

Скопје поведе на натпреварот против Тиквеш со голот на Најдоски, но Каракамишев и Спахиу се погрижија за пресврт и победа на Тиквеш од 1:2.