Тифозите на нозе: Сензационална победа за Леклер и Ферари на Монца!

Ландо Норис беше главен фаворит за освојување на првото место на трката за Големата награда во Италија после се она што го прикажа во текот на викендот, но денешните возбудувања почнаа доста лошо за него, најпрво поради тимскиот колега Оскар Пјастри, а потоа и поради тактиката на Ферари.

Италијанскиот тим ја погоди стратегијата на домашната трка и со тоа успеа да ги израдува илјадниците тифози на Монца, успех од кој најмногу профитираше Шарл Леклер, но и Макс Ферстапен со оглед на ужасниот викенд кој го имаше Ред Бул.

Леклер им ги измеша сметките на Мекларен и успеа да победи пред двоецот Пајстри-Норис, а како клучна се покажа стратегијата според која возачите на Ферари само еднаш влегоа во боксот.

Возачот од Монако успеа да ги изменаџира гумите со тврда компонента и да издржи со едно влегување во бокс, па на крајот без никаква мака го одбрани првото место пред залетаниот двоец на Мекларен.

Пјастри на крајот мораше да се задоволи со второто место и покрај добрите перформанси на патеката, додека најголем губитник е Норис и покрај тоа што се најде на подиумот. Ландо загуби две позиции и пропушти убава шанса поосетно да ја намали предноста на Макс Ферстапен, кој денеска имаше една доста здодевна трка во која се задоволи со шестото место.

Ред Бул целосно потфрли овој тркачки викенд и не му овозможи на светскиот шампион да биде конкурентен, па така пред него завршија и Карлос Саинц и Луис Хамилтон.

Зад Макс заврши Џорџ Расел на седмата позиција, Чеко Перез беше осми, додека во првите десет се најдоа уште Албон и Магнусен.