ТФТ подобар од Гостивар, Еуро Никел доминираше против Вардар

Еуро Никел не дозволи два пораза по ред на гостувањата во Скопје, па денеска рутински го совлада Вардар (68:94) во натпревар од македонското кошаркарско првенство, а малку подоцна ТФТ го доби дербито со Гостивар.

Иако без помошта на дел од своите најквалитетни играчи, кошаркарите на Еуро Никел лесно воспоставија резултатска контрола, брзо дојдоа до двоцифрена предност, а потоа само ја зголемуваа предноста до крајот на средбата.

Сигурниот триум е вкупно четврти за Еуро Никел сезонава, додека Вардар останува на дното со само една победа од шест натпревари.

Казарновски со 24 и Мијатовиќ со 19 поени биле најефикасни во победничкиот тим, додека кај Вардар, Лефкоски и Дујковиќ го завршиле дуелот со по 16 поени.

Многу понеизвесно беше на дуелот меѓу ТФТ и Гостивар, каде по одредени осцилации на двата тима, победникот беше решаван во последниот период.

Во тие последни десет минути, подобро се снајдоа домаќините, го добија со 26:15 и се изборија за победа со резултат 81:73.

Херис и Хортон со по 19 поени биле најефикасни кај ТФТ, додека во редовите на Гостивар се истакна Тодоровиќ со 20 поени.

ТФТ сега има ист ефект како Еуро Никел (4-2), додека Гостивар има ист број победи и порази по шест натпревари.