Тен Хаг за роденденската забава на Рашфорд по поразот од Сити: Тоа е неприфатливо

Манчестер Јунајтед е под голем притисок поради неубедливите игри и слабите резултати, а дополнителен проблем за менаџерот Ерик тен Хаг е и обидот да ја воспостави потребната дисциплина меѓу ѕвездите во тимот.

Последниот испад е дело на Маркус Рашфорд, еден од милениците на фановите, кој сега заработи многу критики бидејќи правел роденденска забава веднаш по убедливиот пораз на дербито со Манчестер Сити.

Рашфорд не ја откажал забавата која била организирана уште пред поразот од 3:0, а напаѓачот се појавил навреме на утринскиот тренинг следниот ден. Сепак, Тен Хаг потврдил пред медиумите дека таквото однесување е неприфатливо.

– Свесен сум за тоа што се случувало и разговарав со него.

– Тоа е неприфатливо и му го кажав тоа, Рашфорд се извини и тука завршува случајот, – рекол Тен Хаг.

Холандскиот стручњак не сакал да открие дали Рашфорд добил казна од клубот.