Тен Хаг состави тим од најдобри пет фудбалери и не селектираше ниту една легенда на Јунајтед

Новиот формат во Лигата на Европа носи слични новитети како во Лигата на шампиони, а фудбалските фанови од денеска ќе можат да уживаат во првата фаза.

Манчестер Јунајтед влегува во новото натпреварување како еден од фаворитите за највисок дострел, но пред првиот предизвик наречен Твенте, Ерик Тен Хаг од УЕФА доби една интересна задача, на која Холанѓанецот одговори доста исцрпно.

Од менаџерот на Јунајтед беше побарано да состави тим од најдобри пет фудбалери кои оствариле голем успех во ова натпреварување, по што Холанѓанецот избра две италијански и една германска легенда, како и поранешни ѕвезди на Ливерпул и Арсенал.

– Мој избор се Џанлуиџи Буфон, дефанзивец е Фабио Канаваро, а во средината ќе го вметна Лотар Матеус. Тука би додал уште еден играч кој може да напаѓа и да се брани. Стивен Џерард имаше добар шут и беше добар финишер, но исто така беше добар и во одбрана.

– Кога е во прашање напаѓачот, мојот избор е лесен, Денис Бергкамп. Тој беше феномен на мал простор, неверојатно брз и извонреден финишер. Мислам дека Буфон, Канаваро, Матеус, Џерард и Бергкамп би биле многу успешни како тим, – изјави Тен Хаг.