Тен Хаг се пожали по победата на Јунајтед: Добиваме нефер третман од Премиер лигата

По двата порази во низа, Манчестер Јунајтед беше приморан да триумфира и денеска се врати на победничките патеки, славејќи на гостувањето кај Саутемптон со 0:3.

Ерик Тен Хаг конечно имаше едно помирно саботно попладне во Премиер лигата и се израдува на уверлива победа на неговиот тим, но дури и во такви услови, Холанѓанецот не пропушти шанса да се пожали за третманот кој го добива великан како Манчестер Јунајтед.

Од вкупно четири меча досега, Јунајтед на два играше во раниот англиски термин од 12:30 часот и еднаш во најдоцниот во сабота, а Тен Хаг смета дека тоа е некоректно кон клубот кој најмногу ги полни трибините и како домаќин, и како гостин.

– Мислам дека нашите фанови добиваат нефер третман. Игравме во најдоцниот термин во сабота, а двапати во 12:30 часот истиот ден. Тоа не е во ред, се случи на три од вкупно четири меча.

– И покрај се, навивачите секогаш се тука за нас и посебно сум горд на нив. Што и да се случи на теренот, тие секогаш не поддржуваат и има многу добра конекција меѓу фан базата и играчите. Навивачите носат неверојатна атмосфера на „Олд Трафорд“, но и на гостинските стадиони. Премиер лигата треба да обрне внимание на ова, мислам дека заслужуваме пофер третман, – се пожали Тен Хаг.