Тен Хаг пред дербито со Ливерпул: Јас не добив исто „наследство“ како Слот

Манчестер Јунајтед и Ливерпул ќе се соочат во премиерлигашкото дерби во недела, а ова ќе биде и прв дуел на холандските тренери Ерик тен Хаг и Арне Слот во англиското првенство.

Тен Хаг трета сезона го води Јунајтед, додека Слот летово го наследи Јирген Клоп на „Енфилд“, а натпреварот кој доаѓа по завршувањето на преодниот рок најавува интересно и неизвесно соочување на „Олд Трафорд“.

Во пресрет на дербито, Тен Хаг зборувал за натпреварот против „црвените“ и направил споредба со периодот кога тој го презел Јунајтед.

– Свесно дојдов овде и прифатив голем предизвик.

– Однапред знаев дека ова ќе биде најтешкото нешто со што ќе се соочам во кариерата, а тоа е да дојдам во клуб во кој ќе мора да бидат решени многу проблеми.

– Не сакам многу да зборувам за Ливерпул, но факт е дека тие се во поинаква фаза. Имаат зрел тим, фудбалери кои долго играат заедно и се поискусни. Нивниот однос и поврзаност се на поинакво ниво и она што Слот го наследи е градено со години, – рекол Тен Хаг.