Тен Хаг по тешката победа во новата сезона: Имам само една критика за тимот!

Џошуа Зиркзе не можеше да замисли подобар старт на авантурата во Манчестер Јунајтед, бидејќи холандскиот напаѓач како „џокер“ од клупата му донесе големи три бода на својот тим на стартот на новата натпреварувачка сезона.

Фулам се покажа како тврд орев и долго одолеваше на театарот на соништата, но повремено внесуваше и голем немир меѓу навивачите на Јунајтед, кои на крајот сепак дочекаа радост во 87-та минута.

Зиркзе изреагира како врвен голгетер и мајсторски ја смести топката во голот, погодок кој донесе огромна радост меѓу навивачите во црвено кои по секоја цена посакуваа отворање на сезоната со три бода.

Ерик Тен Хаг со голема насмевка ги проследи завршните случувањата во воведниот меч од првото коло, а по истиот призна дека има еден сегмент во кој очекува подобри изданија од својот тим.

– Го притискавме Фулам и имаа многу проблеми со нас во текот на мечот. Креиравме многу шанси и мислам дека имавме доволно прилики за порано да поведеме.

– Требаше порано да имаме водстов, тоа е единствената критика која ја имам за мојот тим. Треба да бидеме убијци, треба да реагираме како убијци во шеснаесетникот. На крајот како клучни се покажаа нашите замени, нашата замена го постигна победничкиот гол. Тоа е многу добро за тимот и за духот во нашата екипа. Сите играчи се важни и замените можат да прават разлика на натпреварите, тоа е пораката од денешниот меч, – изјави Тен Хаг.