Тен Хаг: Нема што да докажуваме против Сити

Новата сезона во Англија традиционално стартува со Комјунити Шилд натпреварот на „Вембли“, натпревар на кој се среќаваат шампионот во националното првенство и оној во ФА Купот.

Денес на програмата ќе гледаме нова манчестерско дерби меѓу ривалите Сити и Јунајтед, што всушност ќе биде реприза на финалето од ФА купот од крајот на минатата сезона.

„Ѓаволите“ тогаш успеаја да победат и си ја спасија сезоната која изгледаше загубено, а се чини со тој триумф работата си ја спаси и Ерик Тен Хаг.

Холандскиот стручњак доби нов договор и уште една шанса да го извади тимот на вистинскиот пат, но ако се суди според изјавата на Тен Хаг, денешниот меч не е од преголемо значење за него.

– Веќе знаеме дека можеме да го победиме Сити и нема што да докажуваме денеска. Ништо нема да зависи од денешниот резултат. Што и да се случи, нема да се промени тоа чувство кај нас.

– ФА Купот беше поважен натпревар од овој, но и покрај тоа, ние ќе сакаме да победиме. Покажавме дека можеме да го победиме Сити и влегуваме во мечот со тој менталитет. Ќе се обидеме да победиме, но со играчите на кои можеме да сметаме. Нема да ризикуваме со некои фудбалери кои подоцна би можеле да ги загубиме на долг период, – најави Тен Хаг.