Тен Хаг: Не сме подготвени за почеток на ПЛ, но…

Вечерва (21 часот) се отвара новата сезона во Премиер лигата и тоа со пресметката на „Олд Трафорд“ меѓу Манчестер Јунајтед и Фулам.

Домаќините го имаа статусот на фаворити поради квалитетот, историјата, поддршката од фановите, ама разликата не е како во минатото и Јунајтед ќе треба добро да се испоти за да дојде до посакуваната цел и ги израдува своите поддржувачи.

Јунајтед има проблеми со повреди со одредени играчи, а менаџерот Ерик Тен Хаг признава дека како тим не се максимално подготвен за стартот на кампањата 2024/2025.

-Точно е дека не е претсезона каде што можете за пет-шест недели да работите на тимот. Многу е комплицирано. Го имавме составот на турнејата во САД, потоа ги додаваме играчите кои ги играа на ЕП и Копа Америка, а сега нови засилувања и сега треба да направиме тим од него.

-Овој тим не е подготвен, но лигата започнува – и има и други менаџери кои треба да се справат со овој проблем. Дефинитивно го имаме овој проблем, но сепак имаме некои правила, некои принципи и мораме да започнеме. Не можеме да се скриеме, не можеме да побегнеме од тоа, па мораме да се справиме со тоа, рече Тен Хаг кој веднаш ќе смета на Де Лихт и Мазрауи иако тие пристигнаа само пред неколку дена.