Тебас: Новата Супер лига нема да ги вклучува англиските екипи

Претседателот на Ла Лига, Хавиер Тебас, уште еднаш јавно ја коментирал најавената Супер лига, проект кој тој го критикува од самиот почеток и за кој верува дека и натаму е активен во позадина.

Јувентус, Реал Мадрид и Барселона се клубовите кои не се откажаа од проектот и сега прават нов концепт кој треба да исправи дел од грешките кои ги налутија другите клубови и фановите, а Тебас смета дека евентуалната Супер лига би била создадена без клубовите од Премиер лигата.

– Флорентино никогаш не губи, секогаш ќе излезе со нешто ново. Супер лигата е проект кој датира одамна и повеќе е личен проект на Перез, отколку на Реал Мадрид.

– Проектот продолжува да постои, клубовите ќе се обидат да добијат поддршка од Европската Унија, но владите веќе се позиционираа.

– Сметам дека и новиот проект ќе пропадне, бидејќи во него нема да бидат вклучени УЕФА, ФИФА  и Премиер лигата, – изјавил Тебас.

Објаснувањето доаѓа по најавата на „Њујорк Тајмс“ дека УЕФА ќе воведе нов финансискиот фер плеј, според кој клубовите ќе можат да инвестираат 70 проценти од приходите. Ова им оди во прилог на премиерлигашите кои заработуваат повеќе пари од тв права, па клубовите од Шпанија, Италија, Франција и Германија би станале неконкурентни во Лигата на шампионите и би создале ново натпреварување.