Тебас му одговори на Анчелоти: Карло, жал ми е што Реал те користи за вакви работи

Претседателот на Ла Лига, Хавиер Тебас многу често го критикува Реал Мадрид поради својата актуелна клупска политика со која испраќа жестоки критики на адреса на судиите, а вербалните напади се засилија по последните епизоди кои кулминираа и со барање на клубот за санкционирање на одредени корумпирани судии кои го оштетиле Реал.

Тренерот Карло Анчелоти на последната прес-конференција му одговорил на Тебас, барајќи од него да се фокусира на својата работа и да престане да зборува толку често за Реал, бидејќи на тој начин изразува непочитување кон голем број фанови на клубот.

Тебас не пропушти да му одговори на тренерот на Реал преку социјалните мрежи.

– Карло, сите знаат дека институциите го рефлектираат она што го зборуваат нивните лидери.

– Во фудбалот тоа е изразено и посилно, а со мојата изјава дека одговорните во клубот се „плачковци“, алудирав на првите луѓе кои прават конспирации и сакаат да го стават Реал во улога на жртва.

– Тврдењето дека некој е анти-Реаловски настроен е навреда и за сите противници кои ве победија затоа што биле подобри или имале повеќе среќа на теренот. Ова е навреда за милиони фанови. Јас бев фан на Реал од дете и наративот кој го форсира актуелното раководство не се вклопува во вредностите кои се препознатливи за клубот. Карло, штета е што користат за вакви работи, посебно со оглед на искуството кое го имаш, – истакнал Тебас.