Тажни денови за фамилијата Фергусон: Сер Алекс се збогува со сопругата по шест децении заеднички живот

Британските медиуми пренесоа дека вчера, на 84-годишна возраст починала Кејти, сопругата на легендарниот фудбалски менаџер Алекс Фергусон.

Кејти и Алекс беа партнери речиси шест децении, од кои дури 57 во брачна заедница, во која имаат и тројца синови, меѓу кои и актуелниот менаџер на Питерброу, Дарен Фергусон.

Двојката се сретнала првпат во 1964 година, кога и двајцата се вработиле во иста фабрика, а од 1966 година се и официјално во брак.

– Со голема жал потврдуваме дека Лејди Кејти Фергусон почина вчера, – стои во соопштението на фамилијата Фергусон.

Манчестер Јунајтед објави соопштение со кое изрази сочувство до фамилијата, а фановите не ги заборавиле моќните зборови на трофејниот менаџер, кој јасно го истакна влијанието на сопругата за сите професионални успеси.

– Мојата сопруга имаше клучна улога за време на кариерата, преземајќи улога на столб кој се грижеше за стабилноста и охрабрувањето. Зборовите не се доволни за да искажам колку ми значи, – изјави Сер Алекс во 2013 година, кога ја заврши менаџерската кариера.