Тандемот Палмер-Мадуеке испорача хет-трик за 14 минути, Челси ги потопи „волците“ (Видео)

Челси водеше два пати уште во првото полувреме, но и два пати дозволи израмнување на денешното гостување кај Вулверхемптон. Сепак гостите издоминираа во вториот дел и на крајот славеа со убедливи 2:6.

Џексон погоди уште во 2. минута, Куња израмни дваесет и пет минути подоцна, а во финишот на првиот дел Палмер го совлада противничкиот голман со атрактивен лоб за предност на „сините“. Одговорот стигна во надополнувањето кога Ларсен ги врати домашните фудбалери на почетна позиција во пресрет на полувремето.

Сепак „волците“ немаа одговор за тандемот Палмер-Мадуеке во вториот дел, па првиот испорача три асистенции, а Мадуеке три гола во период до 14 минути, односно од 49 до 63. минута за 2:5.

Тоа беше доволно да се завери првата победа под водство на Енцо Мареска, а до крајот истата беше потврдена од Жоао Феликс, кој ги постави конечните 2:6.

На вториот натпревар Борнмут и Њукасл одиграа со резултат 1:1.