Талески: Знам што значи да си дел од ваков клуб, ќе го вратиме Вардар каде што му е местото

Искусниот македонски голман, Давор Талески е најново засилување за екипата на Вардар.

Прилепчанецот пред неколку дена официјално се раздели со Шкендија, но и во иднина ќе биде „црвено-црн“ со тоа што сега ќе ги претставува нашиот најтрофеен клуб. Талески има големо искуство на нашата домашна сцена, еден период настапуваше и во странство во Финска и Грција.

-Знам што значи да се биде дел од еден ваков голем клуб. Моите очекувања се да се подобриме во оваа полусезона, па во следните години да го вратиме клубот таму каде што му е местото. Шампионска титула и успех во Европа, -порача Талески за веб сајтот на скопскиот тим.

Вардар беше лош во првиот дел од сезоната во ПМФЛ која ја заврши на 11 место и дефинитивно приоритет ќе биде да се обезбеди опстанок, да се дојде до сигурната зона, а тука е и настапот во Купот каде за ривал во четвртфиналето ќе го имаат Силекс.