Сузуки постигна договор за напуштање на МотоГП

Тимот на Сузуки ќе се повлече од МотоГП шампионатот по крајот на актуелната сезона, потврди денеска промотерот „Дорна“.

Однапред најавеното повлекување мораше да мине низ фаза на преговори со сопствениците на МотоГП, а сега двете страни постигнале договор оваа сезона да биде последна за Сузуки.

Јапонскиот производител најави дека се повлекува од МотоГП, но и автомобилските трки на издржливост како 24 часа Ле Ман поради актуелната економска ситуација и желбата да ги алоцира инвестираните средства на друго место.

Сузуки и претходно се повлече од МотоГП и тоа во 2011 година, за да се врати во 2015 година, за пет години подоцна да ја освои титулата со Жоан Мир.

Мир и неговиот клупски колега Алекс Ринс во моментов се на осмото и деветтото место во генералниот пласман, а Сузуки појасни дека поддршката за нив останува до крајот на сезоната.