Суперкомпјутер одреди кои тројца фудбалери треба да ги купи Арсенал за да ја освои титулата

Арсенал минатата сезона не успеа да ја добие битката за шампионската титула, а менаџерот Микел Артета и неговите фудбалери ќе се обидат да ја остварат истата амбиција во актуелната сезона.

Дел од англиските стручни коментатори сметаат дека на Арсенал му фалат неколку топ фудбалери за да ги остави зад Манчестер Сити, Ливерпул и останатите, а така смета и суперкомпјутерот xGold на Total Football Analysis.

Таблоидот „Сан“ ги објави резултатите од анализата на компјутерскиот софтвер и според истиот, Артета треба да купи тројца фудбалери во зимскиот преоден рок, ако сака да се надева на титулата.

Компјутерот му одреди и конкретни предлози на шпанскиот менаџер, па ако Арсенал сака да се радува на крајот на сезоната, ќе треба да ги ангажира Первис Еступинан од Брајтон, Кефрен Тирам од Ница и голгетерот на Штутгарт, Серу Гираси.

Според „Сан“, ако Артета не инвестира во јануари и ако не ја доведе оваа тројка, тоа може да го чини збогување со битката за првото место во Премиер лигата.