Супер Лина ја уништи првата носителка на турнирот во Србија

Најдобрата македонска тенисерка, Лина Ѓорческа со моќно издание ја суреди првата носителка Пана Удварди на ИТФ фјучерсот во Куршумлијска Бања (Србија) што се игра на земјена подлога за награден фонд од 60.000 долари.

Ѓорческа покажа сила, знаење и квалитет против Унгарката која е 98 позиции подобра од ВТА листата, односно и одржа лекција која и овозможи пласман во четвртфиналето на турнирот.

Пресметката на теренот број три траеше 1 час и 13 минута, период во која Лина ја реши фаворитката во два сета. Македонката газеше во првиот и го доби истиот со 6-0, додека во вториот имаше поголема борба која на крајот и припадна на тетовката со 6-3.

Статистички гледано нашиот рекет освои 22 поени повеќе од противничката (63/41), искористи шест од единаесет брејк топки, Унгарката во овој дел имаше еден од четири.

За место во полуфиналето Ѓорческа ќе се надигрува со Далила Јакуповиќ од Словенија, тенисерка која денеска без борба го доби соочувањето со Каролине Вернер од Германија.