Судијата кој го исклучи Белингам под истрага на специјална комисија на шпанската федерација

Шпанскиот судија Хозе Мануел Мунуера Монтеро деновиве е во центарот на вниманието поради одлуката да му додели црвен картон на Џуд Белингам, за што дел од фановите на Реал Мадрид реагирале и со смртни закани на негова адреса.

Мунуера Монтеро ги налути гостинските фанови на дуелот Осасуна-Реал откако детектираше навредливи зборови во репертоарот на Белингам, а засега се уште не е јасно каква казна ќе добие англискиот интернационалец за исклучувањето.

Во меѓувреме, медиумите пренесуваат дека судијата е под истрага на специјална комисија на Шпанската фудбалска федерација, која проверува дали во неговиот ангажман како судија во Ла Лига има конфликт на интереси.

Комисијата утврдила дека Мунуера Монтеро е сопственик на спортско констултантска агенција, чии клиенти се Ла Лига, УЕФА, па и неколку клубови вклучувајќи ги Атлетико Мадрид, Манчестер Сити и ПСЖ.

Доколку одговорното тело утврди дека судијата има конфликт на интереси, може да биде суспендиран до пет години, а ќе заработи и сериозна парична казна.