Стоперот на Тотенхем го впери прстот кон газда Леви: Се надевам дека ќе сфатат каде е проблемот

Тотенхем забележа само една победа на последните седум натпревари и влезе во серија на резултати кои негативно се одразија врз Анге Постекоглу, особено поради фактот што навивачите на клубот почнаа да ја губат довербата во предводникот на тимот.

Постекоглу ги доби првите свирежи и навреди од фановите од Северен Лондон, но еден од првите кои застана во одбрана на менаџерот е искусниот аргентински стопер, Кристијан Ромеро.

Дефанзивецот на Тотенхем смета дека прстот треба да биде вперен кон првиот човек на клубот, бидејќи според него, тимот не може да напредува ако газда Даниел Леви не планира да ги израмни финансиските стандарди кои ги поставија клубови како Сити и Челси.

– Најчесто не се коментира на оваа тема, но вистината е дека мора да се следи трендот на останатите. Манчестер Сити се натпреварува секоја година, се гледа дека и Ливерпул го засилува тимот. Челси секој преоден рок го засилува тимот, а ако не испадне добро, повторно се засилува и сега ги гледаме нивните резултати.

– Тоа се работите кои треба да ги имитираме, треба да имаме поширок ростер на играчи. Мора да се сфати дека грешиме во некои поглед, се надевам дека брзо ќе го разберат тоа. Во последните години секогаш се случува истото. На прво место се обвинуваат играчите, потоа се менува стручниот штаб, а секогаш одговорноста е на друго место. Се надевам дека во најбрзо можно време ќе го разберат тоа, – потенцира Ромеро.