Стојковиќ по ремито со Камерун: Направивме аматерски грешки

Србија имаше два гола предност на дуелот со Камерун, но на крајот успеа да освои само бод на денешната средба на Светското првенство во Катар и си ја отежни ситуацијата во пресрет на последното коло.

Селекторот Драган Стојковиќ по средбата во својата прва изјава истакна задоволство поради подобрената игра и бројот на направени шанси, но истовремено истакна дека Камерунците постигнале два идентични гола поради лошата поставеност на одбраната.

– Резултатот делува фрустрирачки. Игравме добро, прво не искористивме шанси, но и потоа кога губевме, направивме пресврт со три гола.

– Она што пресуди беше непотребното длабоко излегување на одбраната и некој обид за офсајд стапица, тоа се аматерски, кардинални грешки на вакво ниво. Такво нешто не смее да се случува, жално е што противникот ни даде два речиси идентични гола, – изјавил популарниот Пикси.

Србите сега ќе треба да навиваат за Бразил, а потоа во последното коло да ја победат Швајцарија за пласман во следната рунда.