Стојанов пред најтешка мисија до крајот на сезоната: Да избори опстанок како четврти тренер на Брера Струмица

Брера Струмица оди со крупни чекори кон Втората лига по ужасните резултати кои ги има во вториот дел од сезоната, а сето тоа носи нови големи промени кај некогашна Академија Пандев.

Клубот од Струмица ова попладне информираше дека првиот тим го добива и четвртиот тренер од стартот на натпреварувачката кампања, па така Панче Стојанов ќе ја има најтешката задача, а тоа е да се избори опстанок.

По поразот од Вардар во домашното првенство, Тони Атанасов си поднесе оставка од функцијата шеф на стручниот штаб, а денеска пристигна вест дека кормилото го презема неговиот помошник.

Стојанов беше асистент на Атанасов во оваа фаза од првенството, што всушност значи дека 49-годишниот фудбалски работник добро го познава ростерот и играчите со кои располага.

Панче ќе дебитира како самостоен тренер на Брера на натпревар против Вардар, оној во полуфиналето во Купот на Македонија.

Пред Тони Атанасов, оваа сезона тимот од Струмица го водеа и Круљ и Михаилов.