Стоилов: Помислив дека Кире сам ќе ја сврти, но добро испадна

За „Дерби“ од Келн,
Александар Табаковски

Со историскиот пласман на Вардар во финалето на Лигата на шампиони, Стојанче Стоилов вели дека првата цел е остварена и сега на „црвено-црните“ им останува со ладни глави да влезат во утрешното финале во Келн и да се обидат да го победат ПСЖ.

– Победивме во последна секунда со еден гол. Тоа е ракометот, не можеш нон-стоп да играш на исто ниво. Знаеш дека противничкиот тим ќе има свои моменти, па ти ќе имаш свои моменти. Треба да го искористиш својот момент да дадеш што повеќе голови. Циндриќ, Штербик, Душебаев… Мислам дека цела екипа беше на ниво, ова беше тактичко гушење на две екипи што се познаваат добро и што се спремаат еден за друг, па тешко е да наметнеш своја игра – рече Стоилов по победата над Барселона од 26:25.

Македонскиот репрезентативецот го повтори неговиот став од пред фајнл форот дека сите четири тима во Келн имаат подеднакви шанси за титулата, а го искоментира и настапот на неговиот колега од националниот тим Кире Лазаров, кој постигна шест гола за Барселона.

– Едно време мислев дека Кире сам ќе ја сврти, но добро испадна на крај – изјави Стоилов.