Стевковски херој, Македонија Ѓорче Петров го освои Купот на Македонија

Екипата на Македонија Ѓорче Петров стигна до куп титулата откако во вечерашното финале го совлада Силекс по подоброто изведување на пенали откако во регуларниот дел натпреварот заврши без голови, 0:0.

Ова е трет пат по ред во финалето од Купот на Македонија натпреварот да заврши со најнепопуларниот резултат и победникот да се дознае по пенал рулетот.

Ѓорчепетровци беа поуспешни во овој сегмент со 4:3, а херој на скопскиот тим е голманот Стевковски кој скроти два пенали на Силекс.

Што се однесува до регуларниот дел од натпреварот, истиот не изобилуваше со големи прилики. Најзрелата шанса ја имаше Антонио Каланоски кој во 57. минута не успеа да го совлада Стевковски кој повторно беше на висина на задачата.

Со оваа победа Македонија Ѓорче Петров и официјално обезбеди пласман во европските натпреварувња за следната сезона.