Стефановски беше истуркан од патеката, па со херојско издание ја заврши сезоната во ТЦР Италија

Игор Стефановски Иџе вчера го освои шестото место на првата трка која се возеше на Имола, а ова попладне беше на добар пат да оствари уште подобар резултат, но сето тоа му го упропасти Џонатан Џакон.

Италијанецот буквално го истурка македонскиот возач од патеката во ситуација кога беше втор на трката, по што Џакон се откажа по влегувањето во боксот, а популарниот Иџе покажа карактер и се избори за нови бодови во последната трка од ТЦР шампионатот.

И покрај големиот пех и штетата која му беше нанесена, Стефановски се избори за 10-то место на крајот и освои нови бодови, па со херојското возење ја заокружи необичната сезона во ТЦР Италија во која пропушти многу трки поради Ковид кризата.

Инаку, победник на денешната втора трка повторно беше Микел Аскона кој славеше и на првата трка која се возеше вчера, но попладневните возбудувања донесоа и голема возбуда за шампионската титула.

На крајот, нов шампион во ТЦР Италија е Ерик Брилјадори кој го освои второто место на втората трка, а со тоа го доби директниот дуел со Тавано кој заврши петти.

Иако Стефановски беше дел од само четири натпреварувачки викенди, ја заврши сезоната со 67 поени, односно на 12. место од вкупно 29 натпреварувачи кои освоија поени сезонава