Српските медиуми го открија говорот на Ѓоковиќ пред другите српски спортисти во олимпиското село

Новак Ѓоковиќ вчера стави крај на едно долго чекање и после цели 16 години го оствари својот животен сон, односно комплетираше еден тениски циклус кој нависитна е тежок за повторување.

Откако ги освои сите Мастерси и сите грен слем турнир на кои настапи во кариерата, Ѓоковиќ на 37-годишна возраст стана и олимписки шампион, а со тоа стигна до толку посакуваниот „Златен слем“, достигнување до кое претходно стигнаа само Андре Агаси и Рафаел Надал во машка конкуренција.

Ѓоковиќ стигна до големиот успех по тешка и макотрпна борба со Карлос Алкарас во големото финале, но после сите емоции и прославата која ја видовме на теренот, српските медиуми се погрижија да го дознаеме и неговиот говор од олимпиското село.

За да биде целосно изолиран и да остане максимално фокусиран на остварувањето на целта, оваа година Ѓоковиќ не беше сместен во олимпиското село, но по освоениот златен медал, се упатил токму таму и одржал говор пред сите други српски спортисти.

– Многу сум ви благодарен, не очекував да славиме на ваков начин, ми го разубавевте успехот, ова е и ваш успех. Ова е успех на Србија! Вие ме задолживте, никогаш нема да ве заборавам во животот, Олимпијадата е нешто најубаво. Со ова освоено злато, сакам да ви го покажам патот.

– Не сакам да должам, но имам чувство и потреба да ви го кажам ова: Ништо не е невозможно во животот, ова е моја петта Олимпијада. Јас имам 37 години, 20 години се занимавам со тенис, тоа е спорт кој многу троши. Кај нас на 30 години се завршуваат кариерите. Ако не успеев тука, ќе продолжев да пробувам. Секогаш има нова шанса, тоа е она што сакам да ви го кажам. Водете сметка за себе и бидете најдобра верзија од себе секој ден, не само на натпреварите, – им порачал Ноле на своите сонародници во олимпиското село.

Olympic village on fire 🇷🇸 pic.twitter.com/VfSrKq1OHX

— T🍒 (@tennisispain) August 4, 2024